БАЙГАЛЬ ОРЧИН, УУР АМЬСГАЛЫН ӨӨРЧЛӨЛТИЙН САЙД Б.БАТБААТАР ӨНӨӨДӨР /2025.08.01/ НҮБ-ЫН ХҮНС, ХӨДӨӨ, АЖ АХУЙН БАЙГУУЛЛАГЫН СУУРИН ТӨЛӨӨЛӨГЧ ХАТАГТАЙ ЧИНЮН ДИАОГ ХҮЛЭЭН АВЧ УУЛЗЛАА.

2025.08.01

Уулзалтын эхэнд Б.Батбаатар сайд Монгол орны газрын доройтлыг бууруулах, ойн тогтвортой менежментийг дэмжих, ойн нөхөрлөл болон орон нутгийн иргэдийн оролцоог нэмэгдүүлэх, хөдөө аж ахуйн салбарыг байгальд ээлтэй байдлаар хөгжүүлэхэд үр дүнтэй хамтран ажиллаж, дэмжлэг үзүүлж ирсэнд талархал илэрхийллээ.

НҮБХХАБ нь Монгол Улсын ногоон шилжилтийн бодлого, экосистемийн тогтвортой байдал, биологийн олон янз байдлыг хамгаалах, уур амьсгалын өөрчлөлтийн ил тод байдлын бэхжүүлэх хүрээнд олон чухал төслүүдийг хэрэгжүүлж, бодит үр дүнд хүрч буйг онцлон тэмдэглэв.

Мөн зарим төслүүдийн уялдаа холбоог сайжруулах, хэрэгжилтийг дэмжиж ажиллах тал дээр талууд санал нэгдэв.

Уулзалтын үеэр Сайд Б.Батбаатар 2026 онд Монгол Улсад зохион байгуулагдах НҮБ-ын Цөлжилттэй тэмцэх конвенцын (UNCCD) Талуудын 17 дугаар бага хурал (COP17)-ын бэлтгэл ажлыг танилцуулж, НҮБХХАБ-тай хамтран ажиллах саналыг дэвшүүлэв. COP17 бага хурлыг “Олон улсын бэлчээр ба нүүдлийн мал аж ахуйн жил”-тэй уялдуулан зохион байгуулах зорилт тавьж буй бөгөөд Монгол Улсын зүгээс бэлтгэж буй “Бэлчээрийн олон улсын эвсэл”, “Уур амьсгалын өөрчлөлтөд тэсвэртэй гандуу газрын Евроазийн бүсийн төв” байгуулах санаачлагуудын талаар танилцууллаа.

НҮБХХАБ-ын зүгээс COP17 бага хурлын бэлтгэл, зохион байгуулалтын хүрээнд харилцаа холбооны чиглэлээр туслалцаа үзүүлэх, дэмжиж ажиллах боломжтойг илэрхийлэн, Монгол Улсын хүчин чармайлтыг олон улсын түвшинд сурталчлан таниулахад бэлэн буйгаа дурьдлаа.

Энэхүү уулзалт нь Монгол Улс болон НҮБХХАБ хоорондын байгаль орчны салбарын түншлэлийг шинэ түвшинд гаргах, үр дүн, уялдаа холбоог эрчимжүүлэх асуудлыг онцолсон чухал уулзалт боллоо.