#БАЙГАЛЬ_ОРЧНЫ_ХЯНАЛТ_2025: ХУУЛЬ БУС АНГИЙН ЧИГЛЭЛЭЭР ХЯНАЛТ ШАЛГАЛТ ХИЙГДЭЖ БАЙНА
Салбарын улсын ерөнхий байцаагчийн баталсан 01/05 дугаартай удирдамжийн дагуу улсын хэмжээнд Амьтны тухай хуулийн хэрэгжилтийн байдалд хяналт шалгалтыг зохион байгуулж байна.
2025 оны эхний хагас жилийн байдлаар 22 зүйлийн 755 бодгаль амьтныг хууль бусаар зохих зөвшөөрөлгүйгээр амьтныг агнасан, барьсан, тэдгээрийн гаралтай эд эрхтэнг гарал үүслийн тодорхойлолтгүйгээр худалдсан, худалдан авсан, тээвэрлэсэн 168 удаагийн зөрчил илрүүлж хуулийн дагуу арга хэмжээ авч, байгалийн нөөцөд учруулсан хохиролд нөхөн төлбөр оногдуулсан байна.
Зөрчил шалган шийдвэрлэх ажиллагаагаар зөрчил үйлдэхэд ашигласан эд зүйл болох галт зэвсэг 6 ширхэг /Сайга, Вепрь, Саббати, ТОЗ-8/, мөсний өрөм 1 ширхэг, загасны тор 2 ширхэг, загасны уурга, дэгээ 4 ширхэгийг хураан авч, зохих журмын дагуу шийдвэрлүүлэхээр галт зэвсгийг Цагдаагийн байгууллагад, бусад эд зүйлс болон амьтны мах, эд эрхтэнг тухайн орон нутгийн Засаг даргын дэргэдэх орон тооны бус зөвлөлд, тарваганы мах, түүхий эдийг Зоонозын өвчин судлалын төвд тус тус хүргүүлж ажилласан.
28 хуулийн этгээдэд байгаль орчинд учруулсан хохиролд нөхөн төлбөр оногдуулаад байна
Байгаль орчин, уур амьсгалын өөрчлөлтийн яамны Салбарын хяналтын газраас байгаль орчны хяналтын чиглэлийн эрсдэлийн шалгуураар их, дунд эрсдэлтэй үнэлэгдсэн объектод төлөвлөгөөт шалгалтыг улсын хэмжээнд зохион байгуулан ажиллаж байна.
Салбарын улсын ерөнхий байцаагчийн баталсан 01/02 дугаартай удирдамжийн дагуу байгаль орчны багц хууль тогтоомж, дүрэм журам, стандартын хэрэгжилтийг хангуулах, байгаль орчинд үзүүлэх эрсдэлийн түвшинг бууруулах чиглэлээр төлөвлөгөөт хяналт шалгалтыг явуулж байна.
2025 оны эхний хагас жилийн байдлаар улсын хэмжээнд 351 объект буюу нийт төлөвлөгөөт шалгалтад хамрагдах 973 объектын 36 хувийг хамруулан төлөвлөгөөт хяналт шалгалтыг явуулаад байна.
Шалгалтаар байгаль орчны хууль тогтоомж зөрчсөн 194 иргэн, хуулийн этгээдэд зөрчил шалган шийдвэрлэх ажиллагаа явуулж, 28 хуулийн этгээдэд байгаль орчинд учруулсан хохиролд нөхөн төлбөр оногдуулсан байна. Шалгалтын хүрээнд 904 заалт бүхий 328 улсын байцаагчийн албан даалгавар хүргүүлж биелэлтэд хяналт тавин ажиллаж байна.
Улсын хэмжээнд төлөвлөгөөт хяналт шалгалт үргэлжлэн хийгдэж байна.
ЖУРАМ ШИНЭЧЛЭН БАТЛАГДЛАА
Салбарын хяналтын газраас Байгаль орчин, уур амьсгалын өөрчлөлтийн сайдын 2024 оны 09 дүгээр сарын 12-ны өдрийн А/698 дугаартай тушаалаар “Химийн хорт болон аюултай бодис экспортлох, импортлох, хил дамжуулан тээвэрлэх болон үйлдвэрлэх, худалдах журам” шинэчлэн батлагдсантай холбогдуулан аймаг, нийслэлийн Байгаль орчны газрын Байгаль орчны хяналтын улсын /ахлах/ байцаагчдад чиглэл өгөх цахим уулзалтыг зохион байгууллаа.
Тус журмын 2.1.5-д аймаг, нийслэлийн байгаль орчны хяналтын улсын байцаагч химийн бодис хадгалах агуулахын стандартын шаардлага хангасан эсэхэд дүгнэлт гаргана гэж заасан тул байгаль орчны хяналтын Улсын ерөнхий байцаагч 01/19 дугаартай “Химийн хорт болон аюултай бодисын агуулахад урьдчилан сэргийлэх хяналт шалгалт хийх тухай” удирдамжийг баталж, аймаг, нийслэлийн Байгаль орчны газарт хүргүүллээ. Тус удирдамжийн хүрээнд урьдчилан сэргийлэх хяналт шалгалтыг хэрэгжүүлсэнээр улсын байцаагч химийн бодис хадгалах агуулахын стандартын шаардлага хангасан эсэхэд дүгнэлт гаргах боломж бүрдэх юм.
Иймд химийн хорт болон аюултай бодис экспортлох, импортлох, үйлдвэрлэх, худалдах үйл ажиллагаа эрхлэгч иргэн, аж ахуйн нэгж, байгууллагууд нь нийслэл болон тухайн орон нутгийнхаа Байгаль орчны газарт хүсэлтээ гарган Химийн хорт болон аюултай бодисын тухай хуулийн 9 дүгээр зүйлийн 9.1.7-д заасан улсын байцаагчийн дүгнэлт гаргуулан, зөвлөмж зөвлөгөө авч ажиллана уу.
Дараах холбоосоор нэвтэрч мэдээллийг авна уу https://mecc.gov.mn/storage/media/a74371ab-7c9b-45bf-b683-c4880356d5a6.pdf?fbclid=IwY2xjawFxfARleHRuA2FlbQIxMAABHafulzyQ8eMBJpDwKs9JY34Za4NnnlBfa2XNr0Xnb1bQ_8dzBmnOe5Idgg_aem_B0NPwpJ4AG5XpJUskOshuA
