Байгаль орчин, уур амьсгалын өөрчлөлтийн сайд Б.Батбаатараар ахлуулсан томилолтын баг Өвөрхангай аймагт ажиллаж байна
Томилолтын эхний өдөр /2025.07.24/ Орхоны Хөндийн байгалийн цогцолбор газрын албан хаагчид болон Хөгнө Тарнын байгалийн цогцолбор газрын албан хаагчидтай уулзлаа. Орхоны хөндийн байгалийн цогцолбор газар нь нийт 23 хүний бүрэлдэхүүнтэйгээр 380 гаруй мянган га газрыг хариуцан ажиллаж байна. Албан хаагчдын хувьд хамгийн тулгамдсан асуудал нь аялал жуулчлалын улиралд аялагчдын хог хаягдлыг цэвэрлэхэд ихээхэн ачаалал үүсгэж байгааг дуулгалаа.
Ялангуяа баяр наадмын өдрүүдэд Орхон гол дагаж отоглодог аялагчдын нөлөөгөөр ихээхэн хэмжээний хог хаягдал үүсэж байгаа нь байгаль орчныг бохирдуулахын зэрэгцээ ажлын ачааллыг нэмэгдүүлж байгааг онцлов. Мөн өдөр тутмын ажил үүргээ гүйцэтгэх мотоциклын хангамж сүүлийн жилүүдэд тус газарт хуваарилагдаагүйн дээр шатахуун түлшний зардал ч хумигдсан байна.
Тиймээс албан хаагчид хувийн мотоцикл, тээврийн хэрэгсэл ашиглан ажил үүргээ гүйцэтгэж байгаа зэрэг тулгамдсан асуудлуудаа сайдад танилцууллаа. Харин БОУАӨ-ийн сайд Б.Батбаатар, улсын хэмжээнд үйл ажиллагаа явуулж байгаа бүх тусгай хамгаалалттай газар нутгуудад ажиллаж нөхцөл байдалд үнэлэлт дүгнэлт өгч шаардлагатай асуудлуудыг шийдвэрлэхийг зорьж байгааг онцоллоо. Энэ хүрээнд тусгай хамгаалалттай газруудын албан хаагчдаас ирүүлсэн санал дээр үндэслэж судалгааны дүгнэлт гаргах бөгөөд тулгамдсан асуудлуудыг эрэмбэлж бодлогын болон сайдын эрх үүргийн хүрээнд шат дараатай шийдвэрүүдийг гарган ажиллахаа дуулгасан юм.
Үүний дараа БОУАӨЯ-ны харъяа Усны газрын дарга З.Батбаяр шинэ Хархорум хотын усан хангамжийн эко системийг сайжруулах судалгааг танилцууллаа. Хот төлөвлөлттэй нягт уялдуулж тасралтгүй, найдвартай, гүний болон гадаргын усан хангамжийн эх үүсвэрийг бүрдүүлэх судалгааны ажил амжилттай үргэлжилж байна.
Энэ хүрээнд Орхон голын урсац болон хур тундасын усыг хуримтлуулах, урсац нь татарч эрсдэлд орсон Орхон голын урсацыг сэргээх, шинэ хотын зүүн хойно байрлах долоон нуурыг усаар тэтгэж сэргээх боломжтойг судалж тогтоожээ. Ингэснээр Шинэ Хархорум хотын ахуйн хэрэглээний усыг гүний ус ашиглахгүйгээр саарал усаар шийдэх боломж бүрдэхийн зэрэгцээ жилээс жилд татарч бохирдол нь нэмэгдэж байгаа Өгий нуурыг тэтгэх давхар ач холбогдолтойг танилцууллаа.
“ШИНЭ ХАРХОРУМ” ХОТ БАЙГУУЛАХ БЭЛТГЭЛ АЖЛЫН ХҮРЭЭНД 700 МЯНГАН МОД ТАРЬЖ ГАДАРГЫН УСАН ХАНГАМЖИЙГ НЭМЭГДҮҮЛЭХЭЭР АЖИЛЛАЖ БАЙНА
Томилолтын хоёр дахь өдөр Шинэ Хархорум хот байгуулах ажлын хүрээнд хийгдэж байгаа бэлтгэл ажлын явцтай БОУАӨ-ийн сайд Б.Батбаатар танилцлаа. Эртний нийслэл Эрдэнэзуу хийдийг түшиглэн Орхоны хөндийд сүндэрлэхээр тогтсон Шинэ Хархорум хот байгуулах ажил энэ оны гуравдугаар сараас эрчимжсэн бөгөөд хотын захирагчаар Зам тээврийн хөгжлийн сайд асан Л.Халтар ажиллаж хот байгуулах бэлтгэл ажлыг хангаж байна. Энэ хүрээнд гүний усан хангамж, хэрэглээний усан хангамжийн судалгаа хийгдэж байгаа бөгөөд 1550 га газрыг ойжуулах ажил эхэлж өнгөрсөн хавар 700 орчим мянган мод тарьж усалгааны дэвшилтэт систем суурьлуулж, 56 км урттай хамгаалалтын хашаа байгуулжээ. Ирэх намар нэмж 400 орчим мянган мод тарьснаар энэ онд нийт 1.1 сая мод тарих төлөвлөгөөтэй ажиллаж байгааг дуулгалаа. БОУАӨ-ийн сайд Б.Батбаатар хот төлөвлөлтийн хамгийн гол онцлог нь ногоон үзэл баримтлалтыг чухалчлах учиртайг онцлоод цаашид Шинэ Хархорум хот байгуулах түүхэн бүтээн байгуулалтын хүрээнд Хог боловсруулах дэлхийн шилдэг технологийг суурьшуулах, нуур цөөрмүүдийг нэмэгдүүлж усан хангамжийн экосистемийг нэвтрүүлэх, цэвэрлэх байгууламжийг орчин технологиор шийдэх зэрэгт харилцан уялдаатай ажиллаж хамтран ажиллахаа илэрхийллээ.
ӨВӨРХАНГАЙ АЙМГИЙН БАЙГАЛЬ ОРЧНЫ ГАЗАР “ХӨВ ЦӨӨРӨМ” БАЙГУУЛАХ АЖИЛД САНААЧЛАГАТАЙ АЖИЛЛАЖ БАЙГААГ БОУАӨ-ИЙН САЙД Б.БАТБААТАР ӨНДРӨӨР ҮНЭЛЛЭЭ
БОУАӨ-ийн сайд Б.Батбаатараар ахлуулсан ажлын хэсэг үдээс хойш Өвөрхангай аймагт ажиллаж аймгийн Байгаль орчны газрын албан хаагчидтай уулзлаа. Тус аймгийн Байгаль орчны газар нийт 32 хүний бүрэлдэхүүнтэй ажиллаж байна. Аймгийн байгаль орчны газрын даргын зүгээс Арвайхээр хотын ундны усны хайгуул 1987 оноос хойш хийгдээгүйг онцлоод, мөн Сант сумын ундны усны нөөц хүндрэлтэй нөхцөл байдалд хүрсэн тул энэ чиглэлд анхаарч өгөхийг сайдаас хүслээ. Түүнчлэн говийн бүсийн усан хангамжийг сайжруулахаар төлөвлөсөн засгийн газрын төлөвлөгөөний дагуу Орхон-Онги төслийн урсацыг зарим нутагт орших газар тариалангийн талбай дамнуулах, ойролцоо дамжин өнгөрөх сумдын нуур горхиудыг тэтгэх зорилгоор трассын зурагт өөрчлөлт оруулах, сүүлийн 15 жил гадаадын төсөл хөтөлбөр хэрэгжээгүй аймгийн байгаль орчны газарт гадаад болон дотоодын төсөл хөтөлбөр хэрэгжүүлэхэд дэмжлэг үзүүлэх боломжийг тодрууллаа.
БОУАӨ-ийн сайд Б.Батбаатар, салбарын хяналтын газрын дарга Б.Мөнхтогтох нар эдгээр тулгамдсан асуудлуудыг бодлогын түвшинд эрэмбэлэн ангилж шат дараатай арга хэмжээ авч ажиллахаа илэрхийлэв. Эцэст нь Өвөрхангай аймгийн Байгаль орчны газар нийт долоон хөв цөөрмийн төслийг холбогдох газруудаар батлуулж ажил хэрэг болгон бусад аймгуудыг манлайлж байгааг БОУАӨ-ийн сайд Б.Батбаатар өндрөөр үнэллээ.
