Агаарын бохирдлыг бууруулах Үндэсний хороо, Байгаль орчин, уур амьсгалын өөрчлөлтийн яамнаас зохион байгуулж буй 15-100 кВт-ын хүчин чадалтай зуух ашиглагч аж ахуйн нэгж, байгууллагад технологийн шийдэл танилцуулах уулзалт өнөөдөр /2025.03.25/ Чингэлтэй дүүрэгт боллоо.
Уулзалтыг тус дүүргийн Менежер Л.Цэеэрэгзэн нээж, аж ахуйн нэгжүүдийг дулааны улиралд зуухаа өөрчилж, технологийн шийдэл нэвтрүүлэхийг хүсэв.
Үргэлжлүүлэн Агаарын бохирдлыг бууруулах Үндэсний хорооны Ажлын албаны дарга С.Даваасүрэн мэдээлэл өгөхдөө “2025-2026 оны халаалтын улиралд нам даралтын зууханд хатуу түлш түлүүлэхгүй. Тиймээс аж ахуйн нэгжүүд өөрийн хэрэглээнд тохирсон технологийн шийдлийг сонгож, төрөөс санхүүгийн дэмжлэг үзүүлье. Аж ахуйн нэгжийн гаргах 60 хувьд ногоон зээлийн хүүгийн хөнгөлөлт үзүүлж, 40 хувийг төрөөс санхүүжүүлнэ. Төр, иргэн хоёр хамтарч, асуудлыг хэрхэн шийддэгийг харуулъя” хэмээн уриаллаа.
Мөн уулзалтын үеэр БОУАӨЯ-наас аж ахуйн нэгжийн орлогын албан татварын нэг хувийн хөнгөлөлтийн талаар мэдээлэл өгч, Төрийн банк ногоон зээлээ, компаниуд халаалтын тоног төхөөрөмжөө танилцуулав.
Зуух ашиглагч аж ахуйн нэгжүүдийн төлөөлөл ногоон санхүүжилт, зээлийн нөхцөл, дулаалга, эрчим хүчний хүрэлцээ хангамжийн талаар байр сууриа илэрхийлэн асуулт асууж, албаны хүмүүсээс хариултаа авсан юм.
Уулзалт пүрэв гаригт Сонгинохайрхан дүүрэгт үргэлжилнэ.
