Баянгол дүүргийн 15-100 кВт-ын хүчин чадалтай зуух ашиглагч аж ахуйн нэгжүүдэд технологийн шийдэл танилцуулах уулзалт өнөөдөр /2025.03.28/ боллоо.
Агаарын бохирдлыг бууруулах Үндэсний хорооны Ажлын албаны мэргэжилтэн А.Батмөнх зуух ашиглагч аж ахуйн нэгжүүдэд төрөөс үзүүлэх санхүүгийн боломж, дэмжлэгийн талаар мэдээлэл өгөв.
Нийтийн байр, халуун усны газар, дэлгүүр, үсчин зэрэг үйлчилгээний газартаа нам даралтын зуух ашигладаг аж ахуйн нэгжүүд нүүрснээс татгалзаж, технологийн шийдлээр халаалтаа шийдсэн тохиолдолд тоног төхөөрөмжийн үнийн дүнгийн 60 хувьд зээлийн хүүгийн хөнгөлөлт үзүүлж, 40 хувийг төрөөс санхүүжүүлэхээр ажиллаж буйг танилцууллаа.
Агаарын бохирдлыг бууруулах Үндэсний хорооны Ажлын алба, БОУАӨЯ-наас нийслэлийн төвийн зургаан дүүрэгт 15-100 кВт-ын хүчин чадалтай зуух ашиглагч аж ахуйн нэгжүүдэд технологийн шийдэл танилцуулах уулзалтыг 2025.03.19-нд Баянзүрх дүүргээс эхэлж, өнөөдөр Баянгол дүүрэгт өндөрлүүллээ.
Энэхүү цуврал уулзалтаар ТЭЦ-II, ТЭЦ-III, ТЭЦ-IV, Амгалан, Сэлбэ, Налайх дулааны станцаас бусад байгууллагад түүхий нүүрс ашиглахыг хориглосон Засгийн газрын шийдвэрийн дагуу аж ахуйн нэгжүүдийн халаалтын зуухыг цахилгаан, хийн технологиор солих шийдлүүдийг танилцуулж, иргэдийн саналыг сонссон юм.
