Агаарын бохирдлыг бууруулах Үндэсний хорооны Ажлын албаны дарга С.Даваасүрэн өнөөдөр /2025.03.26/ ТИКА олон улсын байгууллагын Улаанбаатар дахь Хөтөлбөр зохицуулах газрын Хөтөлбөр зохицуулагч Муслу Али-тай албан уулзалт хийлээ.
Уулзалтаар нийслэлд түүхий нүүрс ашиглаж буй нам даралтын зуухуудыг шинэчлэхэд хамтран ажиллах боломжийн талаар ярилцав.
Ажлын албаны дарга С.Даваасүрэн ирэх халаалтын улирлаас эхлэн уурын зуухуудад хатуу түлш хэрэглэхгүй бөгөөд Агаарын бохирдлыг бууруулах Үндэсний хороо, БОУАӨЯ төр, хувийн хэвшлийн эзэмшлийн нам даралтын зуухны технологийг шинэчлэхээр ажиллаж байгааг дуулгалаа.
Нийслэлд хатуу түлш хэрэглэдэг 172 мянган айл өрх, 15-100 кВт-ын хүчин чадалтай 2306, 100-аас дээш кВт-ын хүчин чадалтай 174 зуух бий. Эдгээрийн хатуу түлшийг халж, шинэчлэх ажлыг улсын төсвөөр бүрэн хийх боломжгүй. Тиймээс олон улсын байгууллагатай хамтран ажиллаж, Улаанбаатар хотын агаарын бохирдлыг бууруулах шаардлага тулгарч буй юм.
Энэ үүднээс ТИКА-тай албан уулзалт хийж, нөхцөл байдлыг танилцуулав. ТИКА-ийн зүгээс хийн түлш ашиглах зуухны шийдэл, хөрөнгө оруулалтын тооцооны нарийвчилсан мэдээлэл авахыг хүсэж, энэ чиглэлээр хамтран ажиллах боломжтойгоо илэрхийллээ.
