Байгаль орчин, уур амьсгалын өөрчлөлтийн сайд Б.Батбаатар 2025 оны долоодугаар сарын 6-нд Төв, Булган аймгуудад ажиллалаа. Энэ үеэр салбарын сайд Заамар суманд уул уурхайн чиглэлээр үйл ажиллагаа явуулж буй аж ахуйн нэгжүүдийн үйл ажиллагаатай танилцаж зарим асуудлыг шуурхай шийдвэрлэх үүрэг өгсөн. Энэ дагуу дараах арга хэмжээг авч хэрэгжүүлж байна.
Үүнд:
Байгаль орчинд ээлтэй хэрэглээний соёл хэвшүүлэх, хог хаягдлыг ангилан ялгах дадал зуршлыг төлөвшүүлэх, хүний эрүүл мэнд байгаль орчинд үзүүлэх сөрөг нөлөөллийг бууруулах зорилгоор "Хоггүй наадъя" нөлөөллийн арга хэмжээг зохион байгуулав.
Төв аймгийн Заамар суманд ажиллах үеэр орон нутгийн иргэдээс тавьсан хүсэлтийн дагуу уул уурхайгаас үүдэлтэй тоосжилт хүний эрүүл мэнд, байгаль орчинд нөлөөлж байгаа асуудлыг тогтоох, хяналт тавих, зөрчил гаргагчид хариуцлага тооцох чиглэлийг Төв аймгийн Байгаль орчны газарт үүрэг болгов.
Улсын хэмжээнд хог хаягдлын бүртгэл тооллогын ажлыг зохион байгуулан 8 аймгийн 46 сумын 130 байршилд цэвэрлэгдээгүй орхигдсон 860,3 га талбайд хог хаягдал үүссэнийг бүртгэлжүүлээд байна. Үүнд: Говьсүмбэр аймаг 4 сумын 72 цэг 528 га, Баянхонгор аймаг 2 сумын 4 цэг 182 га, Сэлэнгэ аймаг 17 сумын 26 цэг 113,5 га, Булган аймаг 4 сумын 4 цэг 5,8 га, Говь-Алтай аймаг 6 сумын цэг 13,7 га, Хэнтий 13 сум 13 цэг 9,8 га, Архангай 5 сумын 10 цэг 5,3 га, Өвөрхангай 5 сумын 5 га талбайд үүссэн байгааг тогтоож хог хаягдлын бүртгэл тооллого, зохион байгуулалтыг үе шаттайгаар хийж байна.
Хустайн байгалийн цогцолборт газарт ажиллав.
Ашиглалтын хугацаа дууссан устгах шаардлагатай 480 литр шингэрүүлсэн хлорыг эрх бүхий байгууллагад шилжүүлэн устгуулав.
Байгаль орчны багц хууль тогтоомжийн хэрэгжилтийг нэмэгдүүлэх, хяналт шалгалтын үр нөлөөг сайжруулах зорилгоор Зөрчлийн тухай, Зөрчил шалган шийдвэрлэх тухай хуулийг салбарын хууль тогтоомжтой нийцүүлэх, хуулинд нэмэлт өөрчлөлт оруулах саналыг боловсруулаад байна.
Мөн салбарын сайдын зүгээс Байгаль орчныг хамгаалах чиглэлээр идэвхи санаачлагатай ажиллаж буй аймаг, сумыг урамшууллын тогтолцоог хууль эрх зүй орчинтой уялдуулан боловсруулах, энгийн болон аюултай хог хаягдлын дахин боловсруулах үйлдвэрүүдийг аймгийн хэмжээнд байгуулах, сумын хэмжээд хог хаягдлын менежментийг сайжруулах ангиллан ялгах цэг байгуулах асуудлыг судлах үүргийг харьяа газруудад өгч ажилласан.
