Агаарын бохирдлыг бууруулах Үндэсний хороо, Байгаль орчин, уур амьсгалын өөрчлөлтийн яамнаас 15-100 кВт-ын хүчин чадалтай зуух ашиглагч аж ахуйн нэгж, байгууллагад технологийн шийдэл танилцуулах уулзалтыг өнөөдөр /2025.03.19/ Баянзүрх дүүргээс эхэллээ.
Уулзалтыг Баянзүрх дүүргийн менежер Ц.Гомбосүрэн нээж, Агаарын бохирдлыг бууруулах Үндэсний хорооны Ажлын албаны дарга С.Даваасүрэн агаарын бохирдлыг бууруулах чиглэлээр төрөөс баримталж буй бодлого, зуух ашиглагчдад үзүүлэх дэмжлэгийн талаар мэдээлэл өгсөн бол БОУАӨЯ-ны Ногоон технологи, инновацийн хэлтсийн дарга А.Чинбат аж ахуйн нэгжийн орлогын албан татварын нэг хувийн хөнгөлөлтийн санхүүжилтийн тухай танилцуулав.
Мөн Төрийн банк ногоон зээлийн талаар мэдээлэл өгч, Эко ондол ХХК, Монватт ХХК, Тэнгис девелопмент групп, Повертүүл ХХК, Ultrasonic зэрэг компаниуд халаалтын системийн шийдэл, тоног төхөөрөмжөө дэлгэж танилцуулсан юм.
Уулзалтад оролцсон зуух ашиглагчид нүүрснээс татгалзахад бэлэн байгаагаа хэлж, аж ахуйн нэгжүүдийг цахилгааны шөнийн хөнгөлөлтөд хамруулах хүсэлтийг тавьж байна.
Баянзүрх дүүрэгт 15-100 кВт-ын хүчин чадалтай зуух ашиглагч 300 гаруй аж ахуйн нэгж үйл ажиллагаа явуулж байна. Тэдний төлөөлөл 100 гаруй иргэн өнөөдрийн уулзалтад оролцов.
