Агаарын бохирдлыг бууруулах Үндэсний хороо, Байгаль орчин, уур амьсгалын өөрчлөлтийн яамнаас зохион байгуулж буй 15-100 кВт-ын хүчин чадалтай зуух ашиглагч аж ахуйн нэгж, байгууллагад технологийн шийдэл танилцуулах уулзалт өнөөдөр /2025.03.27/ Сонгинохайрхан дүүрэгт боллоо.
Дүүргийн менежер Д.Баярсайхан Сонгинохайрхан дүүрэгт хатуу түлшнээс татгалзах ажил эхэлснийг дуулгаж, энэ жил 80 айлд сэргээгдэх эрчим хүчний эх үүсвэр суурилуулна гэсэн мэдээллийг уулзалтын эхэнд өгч, аж ахуйн нэгжүүдийг агаарын бохирдлыг бууруулах ажилд хамтран ажиллахыг хүслээ.
Агаарын бохирдлыг бууруулах Үндэсний хорооны Ажлын албаны дарга С.Даваасүрэн “Хөрс, агаарын бохирдлыг зөвхөн Үндэсний хороо шийдвэрлэх боломжгүй, иргэд, аж ахуйн нэгж, байгууллагуудтай хамтрахаас өөр аргагүй. Агаарын бохирдлыг бууруулах биш арилгахын төлөө ажиллах зүй ёсны шаардлагатай тулгарсан. Ингэхдээ нүүрсийг нүүрсээр солих биш техник технологийн шийдэл сонгож, утаанаас салах хэрэгтэй байна.
Гэхдээ аж ахуйн нэгжүүдэд санхүүгийн дарамт үүсгэхгүй. Энэ жил 200 аж ахуйн нэгж, дараа жил 300 гэж цалгардуулахгүйгээр зоригтой шийдвэрээр нэгмөр утаанаас салцгаая. Ирэх өвлийн халаалтын улиралд цэнхэр тэнгэртэй Улаанбаатарт өвөлжихийн төлөө хамтран ажиллая” хэмээн аж ахуйн нэгжүүдийг нүүрснээс татгалзахыг уриалав.
Мөн уулзалтын үеэр БОУАӨЯ-ны Ногоон технологи, инновацийн хэлтсийн дарга А.Чинбат аж ахуйн нэгжүүдийн сонгох тоног төхөөрөмжийн 60 хувьд ногоон зээлийн хүүгийн хөнгөлөлт үзүүлж, 40 хувийг төрөөс санхүүжүүлэх боломжийн талаар танилцуулсан юм.
Аж ахуйн нэгжүүдийн төлөөлөл агаарын бохирдлыг бууруулах төрийн бодлого, шийдлийг дэмжиж байна. Утаанаас салахад хэн ч дургүйцэхгүй. Гагцхүү аж ахуйн нэгжүүдэд ашиглалтын зардлын дарамтгүй байх нь чухал гэсэн саналыг хэлж байв.
