Хан-Уул дүүргийн 15-100 кВт-ын хүчин чадалтай зуух ашиглагч байгууллагуудад технологийн шийдэл танилцуулах уулзалт өчигдөр /2025.03.21/ болов.
Хан-Уул дүүргийн Засаг даргын орлогч Ч.Базарзаяа “Агаар бохирдуулагч эх үүсвэрийн улсын нэгдсэн тооллогоор Хан-Уул дүүрэгт 3-15 кВт-ын хүчин чадалтай зуух хэрэглэгч 14 251 айл өрх, 15-100 кВт-ын хүчин чадалтай нам даралтын зуухтай 101 аж ахуйн нэгж, 100-4200 кВт-ын хүчин чадалтай зуух ашиглагч 24 аж ахуйн нэгж бүртгэлтэй байна” гэсэн мэдээллийг уулзалтын эхэнд өглөө.
Агаарын бохирдлыг бууруулах Үндэсний хорооны Ажлын албаны дарга С.Даваасүрэн “Түүхий нүүрснээс сайжруулсан түлшинд шилжихэд иргэн, аж ахуйн нэгжийн хэрэглээнд дарамт учруулаагүй. Одоо хатуу түлшнээс технологийн шийдэлд шилжихэд аж ахуйн нэгжийн анхны хөрөнгө оруулалт, цаашдын хэрэглээний зардалд хүндрэл учруулахгүй.
Аж ахуйн нэгжүүд өөрийн хэрэглээнд нийцсэн технологийн шийдлийг олчихвол төрөөс анхны хөрөнгө оруулалт болон зээлийн хүүгийн хөнгөлөлт үзүүлэх замаар санхүүгийн дэмжлэг үзүүлнэ.
Агаарын бохирдлыг бууруулах ажлыг аж ахуйн нэгжүүдийн хэвийн үйл ажиллагааг алдагдуулахгүй, дарамт учруулахгүйгээр хийхийг зорьж байна.
Утааг төр дангаар шийдэхгүй, аж ахуйн нэгж, иргэнтэй хамтарч шийдвэрлэнэ” хэмээн хамтран ажиллахыг хүслээ.
Мөн энэ уулзалтын үеэр БОУАӨЯ-наас аж ахуйн нэгжийн орлогын албан татварын нэг хувийн хөнгөлөлтийн санхүүжилтийг ашиглах боломжийн талаар мэдээлэл өгч, Төрийн банк ногоон зээлийн үйлчилгээг танилцууллаа.
Зуух ашиглагч аж ахуйн нэгжүүдийн төлөөлөл эрчим хүчний хүрэлцээ, төрөөс олгох санхүүжилтийн зарчмын талаар түлхүү тодруулж, хариултаа авсан юм.
