Агаарын бохирдлыг бууруулах Үндэсний хороо, Байгаль орчин, уур амьсгалын өөрчлөлтийн яамнаас зохион байгуулж буй 15-100 кВт-ын хүчин чадалтай зуух ашиглагч аж ахуйн нэгж, байгууллагад технологийн шийдэл танилцуулах уулзалт өнөөдөр /2025.03.20/ Сүхбаатар дүүрэгт боллоо.
Уулзалтад Агаарын бохирдлыг бууруулах Үндэсний хорооны Ажлын албаны дарга С.Даваасүрэн, БОУАӨЯ-ны Ногоон технологи, инновацийн хэлтсийн ахлах мэргэжилтэн А.Зоригт, Сүхбаатар дүүргийн Засаг даргын Тамгын газрын дарга Ө.Энхбаяр нарын албаны хүмүүсээс гадна хүнсний дэлгүүр, халуун ус, үсчин, нийтийн байр, худалдааны төв зэрэг чиглэлээр үйл ажиллагаа явуулдаг 30 гаруй аж ахуйн нэгжийн төлөөлөл оролцов.
Агаарын бохирдлыг бууруулах Үндэсний хорооны Ажлын албаны дарга С.Даваасүрэн түүхий нүүрснээс сайжруулсан шахмал түлшинд шилжиж, 2019 онд утааг бууруулах нэг алхам хийсэн. Одоо сайжруулсан түлшнээс шинэ технологид шилжих үйл явцыг аж ахуйн нэгжүүдэд санхүүгийн дарамтгүй хэрэгжүүлэхийн тулд зуух ашиглагчидтай санал солилцож байгааг тэмдэглээд, төрөөс анхны хөрөнгө оруулалтын бодит дэмжлэг үзүүлэх боломж байгааг дурдлаа.
Ирэх халаалтын улирлаас эхлэн халаалтын зуухуудад түүхий нүүрс хэрэглэхийг хориглосон бөгөөд сэргээгдэх эрчим хүч, цахилгаан зэрэг эх үүсвэртэй технологийн шийдлийн 40 хувийн санхүүжилтийг төрөөс олгож, 60 хувьд хүүгийн хөнгөлөлттэй ногоон зээл олгох боломж байгааг танилцуулав.
Аж ахуйн нэгжүүд төрийн бодлого тодорхой, шийдвэр тогтвортой байх, арилжааны банкны зээлийн нөхцөлийг хөнгөвчилж, тоног төхөөрөмжийг барьцаанд тавих боломжийг бүрдүүлэх зэрэг нийтлэг шаардлагыг тавьж байна.
Уулзалт маргааш Хан-Уул дүүрэгт үргэлжилнэ.
